Item cum plerumque contingat Rectores procedere ad privationem scolarium seu aliquorom aliorum indebite ex a[b]rupto, aut statutorum ordine non servato, propter quod ad scandala eveniunt et plerumque posset perturbarj, ordinaverunt quod si contingat de cetero aliquem per Rectorem, qui pro tempore fuerit, privarj seu pronuntiari privatum, et talis privatus, seu privatus denuntiatus, asserat se gravatum, seu se iniuste privatum et indebite, et hoc denuntiet per publicum jnstrumentum Congregatori Consciliariorum infra tertiam diem postquam privatus fuerit, seu denuntiatus privatus, teneatur dictus Congregator, ea die vel sequentj post dictam denuntiationem convocari facere ad stationem generalium bidellorum [247] omnes consciliarios et etiam intimare Rectorj et ei qui sic se jniuste privatum assereret, quod ea hora, qua ipse Congregator putaverit convenire, debeant interesse. Quibus congregatis, vel saltem maiori parte Consciliariorum cum ipso Congregatore, ipse Rector causam privationis exponat, ipso privato seu denuntiato privato presente. Cuius defensio et allegatio per ipsum Congregatorem et Consciliarios audiatur, de qua privatione et causis allegatis, ipse Congregator et Consciliarij et Sapiens et Syndicus Universitatis cognoscere possint et debeant. Et si ipsi Congregatorj et Sapienti ac Syndico et duabus partibus Consciliariorum videbitur privationem seu denuntiationem privationis jniustam, seu contra formam statutorum processisse, possint et teneantur talem privatum seu privatum denuntiatum restituj facere. Si vero iuste privatus, et forma statutorum servata videbitur predictis, declarent ipsum iuste et rationabiliter privatum fuisse et esse, ipsumque restituendum non esse. Et nichilominus penam centum solidorum bon. universitati applicandam incurrat propter suam improbitatem et malitiam; a qua privatione restituj non possit, nisi etiam dicta pena centum solidorum bon. soluta. Interim tamen durante cognitione predicta pro non privato habeatur et tractetur. Que omnia expediri et terminari debeant per dictos Congergatorem et Consciliarios infra quindecim dies postquam dicta denuntiatio facta fuerit dicto Congregatori, pena Congregatori et Consciliarijs, qui in predictis fuerint negligentes seu predicta non observaverint, decem librarum bon. Universitati applicanda.