Cum deceat remedijs opportunis calumpniantes pro posse repellere ac calumpnijs et malicijs obviare, statuerunt quod si aliquis calumpniosam vel maliciosam accusationem fecerit seu instituerit contra scolarem aliquem de Universitate predicta, aut ipsi Universitati suppositum, aut offitialem, et trina ammonitione a Rectore, vel de eius mandato, ammonitus non desistat, quod ipse et filij usque in gradum tertium per Rectorem priventur, et privati per scolas publice nuntientur per alterum ex bidellis generalibus infra tres dies a die ultimi termini tertie ammonitionis; a qua privatione restitui non possit, nisi de voluntate eius pro cuius facto privatus fuerit, et solverit universitati predicte decem libras bon. Adeo quod nullus scolaris vel quivis alius audeat vel presumat aliquem scolarem de Universitate aut ipsi Universitati suppositum, vel offitialem accusare, denuntiare, citare, notificare vel convocare, aut citari, accusari, denuntiari aut notificari facere, nisi coram Universitatis Rectore, sive ipsius Rectoris licentia. Et si quis contrarium fecerit, nisi, ammonitione facta per alterum bidellorum ex parte Rectoris, desisterit et expensas factas per partem adversam, siquas fecerit, et per dominum Rectorem taxatas, infra tertiam diem restituerit, per Rectorem privari debeat, omni exceptione remota, et privatus per scolas per bidellum generalem publice nuntiarj; a qua privatione in proximo casu restituj non possit, nisi nomine pene solverit universitatj centum solidos bon. Declarantes et generaliter addentes, quod nullus scolaris nec doctor actu legens, sive sit forensis sive civis, nec etiam aliquis alius universitati suppositus, possit convenirj pro aliqua re mundi coram aliquo judice vel alia persona, nisi coram Universitatis Rectore, sine eius licentia. Et nichilominus in quolibet casuum predictorum contrafaciens, cadat ab omni et quocumque jure suo. Et si contigerit aliquem scolarem Universitatis vel Universitati suppositum, aut dicte Universitatis notarium, aut bidellum dicte Universitatis, Sapientem vel Syndicum, seu aliquem eorum citarj, trahi vel convenirj in alio quocumque foro quam Rectoris maliciose, civiliter vel criminaliter, quod dominus Rector una cum Consciliarijs teneatur talem conventum, citatum aut tractum defendere toto posse. Et si opus fuerit possit convocare doctores, scolares, nationes et quemlibet per se, prout sibi videbitur expedire. Et eodem modo que dicta sunt in defendendo, intelligantur esse dicta in agendo. Addentes etiam quod si aliquis conventus [246] coram dicto domino Rectore per aliquem de Universitate, aut Universitati suppositum, neglexerit comparere et parere mandatis domini Rectoris, aut comparens eius declinaverit iurisdictionem, privetur ipse et omnia sua bona; a qua privatione restitui non possit ipse nec eius bona, nisi satisfecerit ej qui ipsum convenisset, et solverit, nomine pene, Universitatj viginti solidos bon.