[242] Item statuerunt, quod quicumque scripsisse diceretur manu propria aliquam scriptam privatam, compelli possit et valeat quibuscumque remedijs opportunis per Rectorem, ad petitionem eius cuius jnteresse videretur, dictam scriptam coram ipso Rectore recognoscere, et fateri vel negare utrum ipsam scripserit, vel non. Et siquidem diffiteatur ipsam scripsisse, possit et valeat remedijs opportunis compelli ad scribendum, et facta comparatione de scriptura quam fecerit, vel de alia cui fides debeat adhiberi, si reperietur et declarabitur scripsisse, condempnetur in duplum eius quod scripta, que recognosci petebatur, continebat; et sive fuerit confessata, sive non, dummodo per comparationem appareat eius manu, possit et valeat ex ea agi et probarj si obbligatoria esset, etiam si locus, causa, tempus vel testes in ea non contineantur, et dicta pena applicetur tota Universitatj.