Item cum etiam omni iure monopolia, septe et conspirationes sint prohibite, ex quibus dissensiones et scandala temporibus retroactis insurrexerunt et in futurum insurgere possent, statuerunt quod aliquis non audeat vel presumat facere directo vel per indirectum septam, monopolium, conspirationem, ligam, confederationem aut iuramenta in preiuditium Universitatis predicte seu Rectoris, aut alicuius alterius offitialis Universitatis predicte, seu pro tractandis aliquibus negocijs pertinentibus ad Universitatem predictam, vel aliquid aliud facere, dicere seu ordinare aut tractare, propter quod oriri possit scandalum aut dissensio vel divisio in Universitate predicta, aut inter scolares ipsius. Et quod aliquis pro predictis vel aliquo predictorum non audeat vel presumat se congregare, vel in aliquo loco cum alijs convenire, sub pena cuilibet contrafacienti, et vice qualibet, decem librarum bon., quas si non solverit incurrens jnfra decem dies, privetur omni commodo et honore universitatis predicte; a qua privatione restitui non possit, nisi dicta pena soluta. Item quod aliqua ex Nationibus Universitatis non possit, audeat aut presumat se cum alia sociare aut ligam, conspirationem, septam, juramenta vel confederationem facere pro supradictis vel aliquo eorum faciendis, tractandis seu explicandis, nec aliquem sibi offitialem assumere vel eligere, sub quovis nomine, nisi quatenus et prout licet eisdem per statuta Universitatis; sed Natio quelibet divisa et distincta ab alia esse debeat et manere, pena cuilibet Nationi contrafacienti vigintiquinque librarum bon., et cuilibet officiali Universitatis predictis consentienti decem librarum bon., et cuilibet scolari se pro [235] predictis congreganti quadraginta solidorum bon. Et nichilominus, vigore presentis statuti, quod contrafieret non valeat ipso iure, et sit capsum ac pro infecto habeatur et sit. Et in quolibet casuum predictorum quilibet possit accusare et denuntiare contrafacientem, et habeat tertiam partem condempnationis, et si voluerit in credenti[a] teneatur. Statuerunt insuper, quod aliquis directo vel per obliquum non audeat vel presumat dare causam, propter quam scolares moveantur ad rixam, rumorem, septam aut conspirationem vel monopolium faciendum, pena decem librarum bon. cuilibet contrafacientij et pro qualibet vice. Que pene solvi debeant infra octo dies postquam apparuerit aliquem de supradictis incurrisse vel contrafecisse. Alias ad privationem procedatur etiam Nationis totius, si Natio contrafecisset; a qua privatione restituj non possit, nisi pena soluta.