Item statuerunt et ordinaverunt quod quociescunque aliquid debuerit proponj in Universitate, primo per duos dies ante debeat proponi per dominum Rectorem inter consciliarios ad hoc specialiter convocatos, videlicet ad stationem generalem et per bidellos generales, et per ipsum dominum Rectorem et consciliarios debeat tractarj, videri et examinari in presentia notarij Universitatis predicte. Et si ipsi domino Rectori et maiori parti consciliariorum videbitur utile id quod proponi debuerit, et tunc, convocata [232] publice dicta Universitate in capitulo Fratrum Minorum vel in scolis dictorum fratrum ut moris est, jbi proponatur per Rectorem quod ordinatum fuerit. Et tunc liceat cuilibet de Universitate et cuilibet alteri quem predicta tangerent, consulere et arengare super propositis tantum, non divertendo ad aliam materiam sed solum ad id de quo agitur, loquendo generaliter et spetialiter, prout crediderit in sua conscientia utilius fore. Et tunc secundum conscilium consulentium, fiat partitum per ipsum dominum Rectorem, et secundum quod placuerit maiori parti Universitatis procedatur propositis; et quod firmatum fuerit, in scriptis reducatur per dictum Notarium. Item statuerunt quod aliquis scolaris non audeat consulere vel arengare nisi semel, nisi proponerentur diversa diversimode. Et tunc possit super qualibet propositione consulere semel tantum et non plus. Item quod nullus possit vel audeat in dicta universitate aliquid dicere, proponere vel arengare, nisi servata forma predicta; et Rector, qui pro tempore fuerit, teneatur contrafacientes et quemlibet eorum immediate in ipsa Universitate privare ab omni honore et commodo Universitatis, et conde[m]pnet eum in decem libris bon.; a qua quidem privatione restituj non possit, nisi solverit dictas decem libras Universitati, et de voluntate duarum partium universitatis, de qua appareat publicum jnstrumentum scriptum manu Notarij Universitatis. Et nichilominus quod super eo firmabitur non valeat ipso iure. Rector autem, qui pro tempore |erit|, si non observaverit et observari fecerit predita omnia et singula, incidat in penam viginti quinque librarum bon., exigendam in fine sui offitij. Item quod si de partito fiendo oriretur questio inter scolares, quod Rector teneatur convocare ad se consciliarios, et conferre cum eis de partito ponendo, et prout inter eos deliberatum et firmatum fuerit, ita fiat partitum, et aliter non possit fierj. Item quod quociescumque sit aliquod partitum in universitate, non possit fieri nisi sint ibi due partes Universitatis ad minus. Et eodem modo si fieret in natione aliqua vel inter consciliarios; et si per maiorem partem illius, vel illorum qui adsunt, obtinebitur, valeat quod per eos firmabitur, et aliter non, nisi quatenus aliter per statuta aliqua dispositum reperiretur. Item statuerunt quod Consciliarij aliqui non possint convocarj ad domum Rectoris pro aliquibus factis universitatis tractandis, sed solum convocentur ad stationem generalium bidellorum, et per bidellos generales. Item quod si sit dies legibilis aut in qua intretur ad aliquem actum faciendum, quod nunquam convocentur, nisi per scolas publice, ut publice sciri possit quod convocantur, sub pena Rectori decem librarum bon. in quolibet casu. Item statuerunt quod postquam Universitas fuerit convocata et congregata, et Rector proposuerit, nullus scolaris audeat vel presumat exire de universitate, nisi factis et completis hjs que proposita fuerint, sine voluntate et licentia domini Rectoris petita et obtenta, pena cuilibet contrafacienti pro qualibet vice quinque solidorum bon., omni defensione reiecta. Et quod dictum est de scolaribus convocatis in Universitate, eadem intelligantur [233] in congregatione et convocatione consciliariorum cuilibet consciliario, si de dicta congregatione exire voluerit sine licentia dicti domini Rectoris petita et obtenta. Item statuerunt quod congregationes tam Consciliariorum, vel Additorum vel scolarium fieri, debeant horis determinatis et debitis in quibus scolares commodius venire possint, et saltem per unam diem integram ante convocent universitatem, quam congregent adeo quod scolares publice scire possint. Item quod Rector non possit conveniri coram domino Potestate aut Capitaneo, aut Ancianis Communis bon., aut coram domino civitatis pro aliquibus factis Universitatis, aut que tangant Universitatem, sine voluntate et consensu Consciliariorum vel maioris partis, super hoc habito colloquio et tractatu. Quod si secus fieret, incidat penam quadraginta solidorum bon. pro qualibet vice; hoc addito quod nichil possit proponi vel firmarj aut in universitate dici, aut aliqua petitio porrigi de aliquo v[el] pro aliquo, quod sit contra formam statutorum universitatis, pena cuilibet dicenti, proponenti, arenganti, consulenti aut petitionem porrigenti, decem librarum bon. pro qualibet vice; et pena vigintiquinque librarum bon. cuilibet Rectori non observanti et observari facienti predicta. Et quod fieret ipso iure non valeat nec teneat et pro non facto habeatur. Item, si fiat aliquod partitum, nunquam fiat de sedendo ad levandum, sed quando sit partitum semper fiat cum fabis albis et nigris, et aliter non, et quod semper fiat de una re sola, affirmando vel negando, et sic de singulis rebus fiendis. Et si aliquid contrafieret, ipso iure nichil valeat.