Item statuerunt quod Rectores, eorum finito offitio, a sacramenti prestatione successoribus sint immunes, ymmo nec statutis aliquibus aliquatenus sint astrictj, illis solis statutis exceptis, quibus non servatis, scandalum in universitate seu inter scolares induci posset; cuius scandali verbj interpretatio Rectoris, quj pro tempore fuerit, et maioris partis consciliariorum una cum domino Rectore, arbitrio relinquatur. Et si contingat eos vel aliquem eorum velle promoverj ad examen et ad publicam vel privatam in artibus vel Medicina vel utroque, simul vel divisim, vel qualitercumque voluerit, non teneatur ad solutionem alicuius quantitatis pecunie doctoribus, Universitatj, aut bidellis universitatis vel doctorum, aut alterj persone pro dicta privata vel publica aut alia dignitate assumenda, pena cuilibet petenti vel recipienti decem librarum bon., preterquam trombatoribus vel pulsatoribus universitatis, quorum salario ex predictis non derogetur, postquam depositum offitium aliorum jure fruantur in hospitijs conducendis. Et quod, quando Rector venerit ad publicam vel privatam, nichil solvat alicuj persone, non obstante aliquo statuto doctorum vel aliorum in contrarium faciente; nec aliqua alia persona occasione domini Rectoris aliquid solvat. Item quod nullus Rector gaudere possit privilegijs Rectoribus concessis, nisi per sex menses continuos Rectoris offitium exercuerit. Item quod nullus Rector privarj possit in suo offitio Rectoratus. Nec aliquis quj fuerit Rector privarj possit de universitate, ymmo gaudeat omnibus privilegijs quibus gaudent Rectores in suo offitio, et semper possit stare in universitate congregata et dare vocem in illa, ut dabat quando erat Rector, et stare penes Rectorem actu existentem, sive sit doctor, sive non, sive legat, sive non. Et si contingeret quod aliqua jniuria verbo, re, vel facto, esset sibi illata, inferens incurrat penam quam incurreret si intulisset Rectori actu existentj. Et Rector actu existens teneatur pro illo qui fuerit Rector servari facere statuta iuxta posse, que facerent in favorem ipsi[us], sub pena prestiti juramenti et quinquaginta librarum bon., in suo syndicatu auferenda, et universitati applicanda. Et quicumque qui temptaverit Rectorem actu existentem suo offitio privarj, vel illum qui fuerit Rector privarj de universitate, vel privilegia eorum destrui vel annullarj vel non observari, incurrat penam centum librarum bon. et perpetue privationis; ymmo intelligatur eo facto privatus et condempnatus ut supra. Item quod quilibet Rector et qui fuerit Rector, in quolibet partito possit dare duas fabas et habeat duas voces. Ille autem qui fuerit vicerector consimilibus privilegijs gaudere intelligatur. Et quod qui fuerit Rector, post depositum offitium, non possit modo aliquo eligi ad aliquod offitium universitatis predicte; et si eligeretur, non valeat electio ipso jure. Et nichilominus, si quam primum sciverit, non renuntiaverit, penam incidat periurij et viginti quinque librarum bon. Universitati applicandam. Et nullus privilegium contra formam huius statuti [et] tenorem valeat impetrare, et si impetratum fuerit, nullius [228] sit momenti. Sortiatur insuper dictus condam Rector omnia et singula privilegia et benefitia, que et quatenus reperirentur concessa ej ante predicta statuta.