Item statuerunt quod si contingeret, quod Deus avertat, dici Rectorem presentem vel alium qui pro tempore fuerit, malignari, aut se malitiose, dolose, vel fraudolenter in factis, negocijs vel rebus universitatis aut circa facta, negocia vel res seu jura dicte universitatis, et hoc propositum seu expositum fuerit Congregatori consciliariorum per aliquem de Universitate vel universitati suppositum aut offitialem seu obedientem, teneatur Congregator infra tertiam diem convocari et congregari facere Consciliarios et Sapientem ac Syndicum universitatis ad stationem generalium bidellorum pro condecenti hora, et, eis congregatis, inter eos proponere supradicta. Et si duabus partibus dictorum Consciliariorum et Sapienti visum fuerit Rectorem malignari, aut se fraudulenter et malitiose vel dolose in factis, negocijs, vel rebus aut circa facta, negocia, res seu jura Universitatis, teneatur Congregator infra octo dies, quam citius fieri poterit, convocari facere Universitatem in loco consueto per alterum ex bidellis generalibus, qui in predictis et alijs, offitio Congregatoris impositis, obedire eidem, pena centum solidorum et privationis, omnino teneantur. Et ad eius requisitionem omnes et singuli de universitate predicta se congregare teneantur, pena decem solidorum pro quolibet, nisi iustam et rationabilem defensionem haberent. In qua universitate congregata, idem Congregator predicta proponere possit et teneatur, absente tamen semper Rectore a congregatione et congregationibus predictis, et super eis partitum facere. Et secundum quod per maiorem partem universitatis ordinatum, firmatum, provisum seu dispositum fuerit, excepto de privatione, procedatur et fiat, pena Congregatori consciliariorum qui in predictis negligens fuerit aut predicta iuxta posse non observaverit, decem librarum bon pro qualibet vice. Et nichilominus eo casu predicta offitio et ad offitium Sapientis et Syndici universitatis predicte incumbant. Statuerunt insuper quod dominus Rector presens, et quilibet qui pro tempore fuerit, teneatur et debeat recipere patienter et benivole omnes et singulas petitiones coram eo porrigendas, que tamen non sint contra formam aliquorum statutorum universitatis predicte, pena ipsi Rectorj centum solidorum bon. universitati applicanda. Et eo casu talis petitio porrigi possit et recipi debeat coram Congregatore consciliariorum, et per ipsum et in ea et super ea procedatur secundum formam statutorum dicte universitatis.