Item cum sepe contingat quod multi scolares ante tempus electionis novi Rectoris maliciose se absentant ad hoc ut offitium Rectoratus evitent, et malicijs sit obviandum in quantum natura suffragatur humana, statuerunt quod si aliquis de natione illa de qua, secundum ordinem, immediate fieri debet electio novi Rectoris, vel nationis alterius eam immediate sequentis, a civitate Bononie se voluerit vel procuraverit absentare, quod talis teneatur, sub virtute prestiti sacramenti et sub infrascripta pena, se presentare per se vel alium legitime coram Rectore, qui pro tempore fuerit, et allegare suum recessum et causam propter quam vult recedere; et tunc dominus Rector ea die vel sequenti teneatur convocari facere nationem de qua esset talis absentaturus, et inter scolares nationis predicte proponere quod talis dicit quod vult se absentare ex talj causa, nominando talem se absentare volentem et causam quam allegat se velle absentare, et utrum sit suffitiens ad offitium Rectoratus. Qua excusatione audita, Rector una cum [222] illis de dicta natione teneatur proponere in universitate, et illud quod maior pars uinversitatis deliberaverit, sit optentum, ut dictat supra statutum de electione novi Rectoris. Et si per maiorem partem nationis sue fuerit approbatum quod sit suffitiens ad Rectoris offitium exercendum, si contigerit eum eligi, teneatur dominus Rector, qui pro tempore fuerit, eidem precipere, seu precipi |facere| quod per tres dies ante tempus electionis fiende de novo Rectore, presentabit per se vel ydoneum substitutum, coram domino Rectore et Consciliarijs. Quod si non fecerit, et contingerit dictum talem eligi ad Rectoratus offitium exercendum, ipso facto incidat in penam vigintiquinque librarum bon. Et tunc procedatur ad electionem de alijs, fiendam de dicta natione secundum formam statutorum loquentium de electione novi Rectoris. Sj vero per maiorem partem dicte nationis approbabitur pro iusuffitienti ad offitium antedictum si eligeretur, tunc dominus Rector det et dare possit eidem licentiam recedendi. Et sic successive procedatur de natione in nationem. Ante autem quam per Rectorem fiat propositio predicta in natione iam dicta, vel fiat aliquod partitum, teneatur Rector sacramentum deferre cuilibet de natione predicta quod iuste et sine fraude approbabit vel reprobabit, sub pena vigintiquinque librarum bon. ipsi Rectorj. Et quia aliquando etiam contingit quod aliqui scolares, propter evitandum offitium Rectoratus, malitiose consueverunt facere se privarj, statuerunt quod non obstante tali privatione facta de aliquo scolarj, talis privatus nihilominus possit eligi in Rectorem, ita tamen quod, quando acceptaverit offitium Rectoratus, incontinenti teneatur se concordare cum eo ad cuius petitionem fuisset privatus, sub pena librarum viginti bon., quam penam teneatur exigere a dicto Rectore sequens Rector sub dicta pena. Si autem talis electus esset privatus propter iniuriam factam alicuj, consciliarij teneantur videre et examinare iniuriam que facta fuisse diceretur per talem privatum, ac facere et curare toto posse quod dictos iniuriantem et iniuriatum ad concordiam et compositionem perducant. Et in predictiis habeant purum et generale arbitrium procedendi, cognoscendi et terminandi, non obstante aliquo statuto. In quo casu partes comparere et parere debeant mandatis dictorum consciliariorum, sub pena vigintiquinque librarum bon. Et quod nichilominus dicti consciliarij possint procedere ad talem privatum restitui faciendum a privatione predicta.