Item cum Rectores dicte Universitatis varijs, diversis et inordinatis expensis sepius aggraventur, ita quod futuris Rectoribus non acceptandi dictum offitium prebent signaculum et exemplum, statuerunt quod aliquis in Rectorem universitatis predicte electus seu eligendus, tempore sue electionis non possit vel debeat dare scolaribus vel alijs quibuscunque eum associantibus ad domum ipsius, confectiones vel vinum, nec, infra mensem a die sue electionis usque ad completorium non computato, audeat vel presumat tripudiare aut tripudiari facere cum trombis vel sine vel cum alijs instrumentis, de nocte, cum doplerijs vel sine, directe vel indirecte, nec convivium aliquod facere etiam die electionis predicte, in quo intersint ultra duodecim homines, sub pena cuilibet electo et pro qualibet vice decem librarum bon. et cuilibet scolari tribudiantj aut se in convivio congreganti contra dictam formam, viginti solidorum bon. Quam penam si aliquis predictorum inciderit, Rector sequens exigere teneatur sub dicta pena. Quod statutum habeat locum ubi placuerit Rectori electo.