[220] Item statuerunt quod quicunque in Rectorem de cetero fuerit electus, tempore acceptationis offitij antedicti teneatur sacramentum corporalem sub hac forma prestare Rectori, qui tunc esset, pro ipsa Universitate recipienti, scilicet quod in quantum sibi erit possibile procurabit toto posse omnia et singula pertinentia, seu que pertinere aut facere putaverit quoquo modo, ad conservationem et augmentationem ac bonum et pacificum statum universitatis scolarium studij medicine et artium Civitatis Bononie, ipsamque universitatem et studium conservabit et scolares ipsius pacifice et devote tractabit. Item servare omnia et singula statuta facta et fienda et ordinamenta omnia que per ipsam Universitatem fient, vel fuerint approbata et jurata et ea ac omnia et singula in eis contenta, observarsi facere iuxta posse scolaribus et alijs quibuscunque, qui ad ipsorum observationem quoquo modo tenentur, sub penis in eis contentis. Et quod omnes et singulas penas quas aliquis incurrerit seu incurrisset, effectualiter et iuxta posse exiget, quas si non exegerit iuxta posse, de suo Universitati predicte persolvet. A quibus sacramento, penarum exactione et prestatione, nullo modo absolvi possit, sed etiam ad ipsarum penarum non exactarum et quas incurrerit solutionem per sindicos, tempore sindicatus, dicte Universitati effectu[ali]ter compellatur. Iurabit insuper procurare toto posse, fideliter et sine fraude, quod sibi tempore statuto successor ydoneus eligatur, et quod in ipsa electione et circa ipsam servabit pura fide omnia et singula circa ipsam et in ipsa disposita, statuta seu provisa. Item jurabit post finem sui offitij et regiminis per quindecim dies Bononie continuato tempore permanere et stare ad sindicatum, ac iuri parere secundum quod et prout contra eum inventum, statutum, pronuntiatum seu sententiatum fuerit; et quascunque condempnationes de eo fiendas ac penas quascunque sibi infligendas solvere, et supra predictis suo successori in omnibus obedire; et si oportuerit eum ex aliqua iusta causa antedictos quindecim dies completos recedere, ydoneum procuratorem relinquere, qui promittat et satisdet ydonee eius nomine de jure cuilibet respondere, et generaliter omnia et singula observare et adimplere ad quo tenetur ratione quorumcunque statutorum tam factorum quam fiendorum, aut provisionum Universitatis predicte. Teneatur autem tempore acceptationis et juramentj offitij antedicti dare, tradere et dimittere depositario Universitatis ydoneum pignus, valoris viginti quinque librarum bon., quod pignus penes ipsum depositarium seu massarium debet remanere usque quo per syndicos eligendos ad sindicandum ipsum dominum Rectorem, idem Rector fuerit absolutus aut condempnationem de eo fiendam solvisset, et alia erunt adimpleta que adimpleri debent secundum formam aliquorum statutorum. Quod pignus idem Massarius et Depositarius, jn casum in quem dictus Rector condempnaretur per dictos sindicos, nisi condempnationem de ipso Rectore factam ipse Rector solverit infra octo dies post condempnationem sequentes, vendi facere teneatur, et solvere condempnationem predictam, residuum vero ipsi Rectori restituere. Ac etiam teneatur dicto tempore facere interesse trombatores prefate Universitatis, vel alios cum nacharis et zalamella, qui cum gaudio et letitia teneantur associare dominum Rectorem ad domum sue habitationis. Pro quorum labore depositarius Universitatis prefatus teneatur dare cuilibet dictorum trombatorum, seu duobus trombatoribus, quinque solidos pro quolibet, et nacharato unj tres solidos [221] bon. et zalamelle uni quinque solidos bon. pro associando dictum Rectorem ab ecclesia sancti Francisci usque ad domum, et hoc de pecunia universitatis. Et si Rector electus voluerit corcizare aut corcizari facere per terram aut aliter gravare dictos trombatores, quod tunc, ultra quantitatem predictam, teneatur solvere de sua propria pecunia. Et eodem modo dicimus, si voluerit plures trombatores predictis, quod satisfaciat de sua propria pecunia.