Quoniam sine ordine, duce et capite nulla Universitas nullumque corpus sive collegium recte regitur, ducitur seu gubernatur, id circo pro regulatione, conservatione et augmentatione Universitatis predicte et scolarium ipsius, in primis statuerunt quod Universitatis predicta scolarium forensium medicorum et artistarum studij civitatis bononie semper habeat et habere debeat pro suo capite, duce et Rectore unum probum virum, scientia, moribus ac virtutibus ornatum de Universitate predicta, qui Rector ipsius Universitatis et scolarium eiusdem comuniter et publice nominetur et sit. Cuius officium inchoetur finiatur et duret prout in statutis inferioribus continetur. Et habeat iurisdictionem in scolares Universitatis predicte et quoscunque alios, qui legibus et statutis dicte Universitatis directo vel per obliquum ligari possunt, prout in dictis statutis continebitur, item novem consciliarios, habeat etiam dicta Universitas unum sapientem et sindicum, qui dictorum [215] statutorum virtute, sit et esse intelligatur Sapiens Sindicus et protector dicte Universitatis et scolarium, et unum notarium, qui sit notarius et de societate notariurum civitatis Bononie, intelligentem et doctum, qui scribat et conficiat scripturas Universitatis predicte, et acta causarum agitandarum coram ipso Rectore, sententias et precepta per ipsum ferenda et fienda, et alia quecunque que per ipsum Rectorem seu coram ipso fieri seu agitarj contingerit scriptura digna, item duos bidellos generales per quos serviatur ipsi Rectori et dicte Universitati et scolaribus, item unum depositarium generalem per quem recipiantur, custodiantur, salventur et expendantur, si opus fuerit, omnes et singuli introitus Universitatis predicte, a quo reddaturque sue gestionis et administrationis ratio, tempore debito, et alia quecunque fiant, que et prout eidem et eius officio per statuta predicta iniungentur. Quorum omnium et singulorum offitium, jurisdictio et potestas sic inchoetur et fiat secundum quod et prout per ipsa statuta ordinabitur. Et illi sint et esse intelligantus offitiales predicti et dicte universitatis, de quibus in ipsis statutis continebitur. Et quia decens est scolares Universitatis predicte sentire pariter de commodo, incommodo et honore quod commode fieri non posse videtur, nisi ad [ordinem reducantur], secundum quiem offitia, benefitia et honores successive et equaliter conferantur, statuerunt quod scolares Universitatis predicte dividantur et sint et esse intelligantur divisi in quatuor nationes, scilicet Lombardorum, Ultramontanorum, Romanorum, et Tuschorum, que omnes nationes simul unite et iuncte Universitatem faciant antedictam. De quibus nationibus ordine, modo, tempore et forma comprehensis in statutis, eligantur Rector prefatus et Consciliarij, de quibus in dictis statutis continebitur.