Ad honorem et gloriam omnipotentis dei et glorioxe virginis marie matris [eius], tociusque curie supernorum, nec non ad honorem et laudem beatissimi et santissimi Luce evangeliste, et sanctorum cosme et damianj, statuimus et ordinamus quod omni anno in principio nostri studij, sermone celebrato, teneantur et debeant festum facere cum tubis et timanis et zalamella nostri collegij et universitatis eiusdem singuli et omnes doctores utriusque membri collegij, medicorum videlicet [et] artistarum et qui in matriculla fuerit perfectorum cirusicorum, omnesque scolares de universitate dictarum facultatum, in ecclesia beati Luce, que est in porta de castello, aut in ecclesia sanctorum cosmi et damianj, que est penes pontem de ferro, aut in aliqua ecclesia in qua fuerit altare alicuius sanctorum predictorum. Et quilibet doctor utriusque membri collegij solvere teneatur soldos tres bon., et quilibet qui fuerit de matriculla perfectorum cirusicorum solvere teneatur soldos duos bon., et omnes et singuli scolares, qui de universitate, vel matriculla fuerint scolarium dictarum facultatum, solvere teneantur soldum unum bon., et cum dupleris et candelis seriose et ordinate vadant ad dictum festum, servato semper ordine preposterioritatis inter omnes. Et quod rector universitatis scolarium antecedat et priores utriusque collegij sequantur, ipsum tenentes in medio in eundo et redeundo ad dictum festum; qui tamen rector et priores percipere faciant per bidellos suos omnibus et singulis doctoribus cirusicis et scolaribus predictis, per unam diem antea, quod solvere teneantur massario collegij phisicorum predictas pecunie quantitates et pro duplerijs et candelis, vel alijs oblationibus faciendis supradictis ecclesijs dictam pecuniam debea[n]t dispensare, sub pena cuilibet contrafacienti [520] decem soldorum bon., nisi solverit, nulla acepta excusatione vel deffensa. Item statuimus quod quilibet magistrorum nostri presentis collegij phisice facultatis, qui dignitates non habuerint in conventu, ad inefabillem medicine scientiam extolendam, illas possit assumere publice vel private, dumtaxat solverit cuilibet doctori prefatj collegij quatuor soldos bon., et domino archidiacono ac nostro priorj cuilibet unum biretum, cirotecas et anullum pretij saltim viginti soldorum bon. Adiungentes et iniungentes quod quicumque doctor prefati collegij, qui dignitates non asumpserit vel habuerit, immunis erit a salario predicto, silicet inter habentes dignitates predictas tantum dictum salarium partiatur.