Constituimus et ordinamus etiam quod pro honore studij bon. et pro utillitate scolarium in medicina studentium, et ad utille et bonum publicum, quod nullus doctor physice facultatis, civis vel forensis, audeat vel presumat legere praticam medicine, nisi fuerit doctoratus in civitate bon., vel alibi in famosissimo studio; et legerit, vel praticaverit, in dicta scientia per spatium trium annorum ad minus postquam doctoratus fuerit, de quo plenam faciat fidem nostro collegio et doctoribus eiusdem, sub pena centum ducatorum aurj, Camere domini legati totaliter aplicanda, et hoc tociens, quociens contrafecerit. Item, quod nullus possit, audeat vel presumat legere in scientia medicine bon. tam in physica quam in cirusia, nisi fuerit doctoratus in eadem scientia in medicina, videlicet in physica, sub pena cuilibet contrafacienti quinquaginta librarum bon., aplicanda pro tercia parte domino potestati, et pro tercia parte sancto Petronio, et pro tercia parte nostro collegio. Adhicientes etiam quod nullus, cuiuscumque condictionis existat, audeat, vel presumat, preponi, vel facere se proponi ad aliquam lecturam medicine, nisi fuerit primo doctoratus, sub eadem pena exigenda per dictum potestatem, vel priorem nostri collegij, aplicanda modo predicto. Et ipsa ellectio ipso iure sit nulla. Et si rector actentaverit contra hanc nostram constitutionem, ipso facto privetur omnj comodo eidem per nostras constitutiones concesso.