Item statuimus quod quilibet qui promoveri voluerit ad examen medicine, teneatur in privato examine dare et solvere collegio medicorum, pro salario doctorum eiusdem, libras duodecim bon., et pro eius publica alias duodecim libras bon.; que pecunia, tam in privata quam publica, deponi debeat penes notarium vel bidellum dicti collegij equaliter dividenda per eos vel alterum eorum inter doctores dicti collegij numerarios tunc ibidem presentes. Adhicientes quod nullus ex doctoribus dicti collegij de dicto salario possit alicui facere gratiam, vel remissionem, nisi prius per priorem dicti collegij fuerit positum partitum inter doctores eiusdem collegij, et inter eos obtentum, ut supra, nemine eorum discrepante, sub pena priori contrafacienti trium ducatorum auri, et cuilibet doctori duorum ducatorum, dicto collegio aplicanda, et dividenda ut supra.