Statuimus, ordinamus et firmamus quod constitutiones et sigillum nostri collegij debeant esse penes priorem dicti collegij, qui pro tempore fuerit, quas constitutiones et sigillum teneatur dictus dominus prior statim in cohadunatione, quam primo fierj fecerit novus prior, reassignare sequenti priori. Et ipsam reasignationem facere scribi et registrari in actis notarij dicti collegij, ut sic possint esse salve res predicte perpetuo, sub pena decem librarum bon. priori omictenti facere predicta vel aliquid predictorum, exigenda et dividenda inter collegium. Et si contingerit perdi predictas constitutiones et sigillum, teneatur dictus prior, penes quem erant dicte constitutiones et sigillum, infra unum mensem, omni exceptione remota et reiecta, facere exemplare de novo dictas constitutiones ad exemplum illarum, que erunt in camera actorum, omnibus suis expensis, manu notarij collegij prelibati. Et facere fieri sigillum tale, ut est illud quod habet ad presens dictum collegium, omnibus expensis prioris predicti, qui non ressignaverit dictas constitutiones et sigillum, omni exceptione remota [et] cessante, sub pena viginti quinque librarum bon. exigenda et dividenda, ut supra. Mandantes insuper quod nullus tante temeritatis et audatie sit, quod audeat vel presumat sigillare sigillo dicti collegij aliquam licteram sine licentia maioris partis doctorum collegij predicti, de qua licentia constet per acta notarij collegij, sub pena perpetue privationis de dicto collegio ipso iure et facto, et nichilominus pena vigintiquinque librarum bon. priori collegij, penes quem fuerit dictum sigillum, eidem collegio aplicanda.