[508] Statuimus et ordinamus quod doctores bonon., ut supra, possint legere in scientia medicine Civitatis bononie quacumque hora libros ordinarios, ordinatos et ordinandos per eos ad quos spectat, horis consuetis, prout de eorum processerit voluntate. Et quod dicti doctores, vel aliquis eorum, non audeant vel presumant loco eorum, vel alterius eorum, subrogare aliquem ad legendum, vel permictere legere ordinarie dictos libros in medicine scientia, qui non sit collegiatus, ut supra, nec patiatur quod aliquis subrogetur, vel pro eo legat, sub pena decem librarum bon. Quam penam si non solverit infra octo dies post mandatum domini prioris, ipso iure et facto sit privatus, et esse intelligatur, de collegio, donec solverit dictam penam, et quod nullus, qui non sit collegiatus, ut supra audeat vel presumat legere in dicta civitate de mane dictos libros. Et quod doctores procurent toto posse suo, quod constitutio presens inviolabiliter observetur.