Providemus et ordinamus quod quilibet doctor collegij medicine teneatur incedere in habitu honesto et in habitu condecenti honori et statui doctoratus. Et quod semper quilibet doctor dicti collegij teneatur ad publicam cuiuslibet promovendi in sancto petro deferre caputeum vario foderatum, vel siricho, et similiter ad exequias alicuius doctoris nostri collegij, nisi fuerit tempus pluvie vel caloris vel nisi aliter fuerit ei per priorem dicti collegij preceptum vel ordinatum. Et si aliquis in aliquo predictorum contrafecerit, ipso facto incurrat in penam decem soldorum bon., aplicandorum collegio pro quolibet eorum et qualibet vice. Et quod nullus doctor nostri collegij possit transire limites sue habitationis per treginta pertichas, sine uno socio pedestre vel equestre, sub pena xx soldorum pro qualibet vice aplicanda, ut supra.