Considerantes quod propter lecturam ordinariam in medicina actributam doctoribus nostri collegij, et continuatam per eos, studium medicine in civitate bononie est auctum et conservatum, statuimus et firmamus quod ipsum Collegium et doctores eiusdem collegij vincullo sacramenti ab eis et quolibet eorum prestandi, teneantur facere et curare, quantum in eis et eorum fuerit possibillitas, quod doctores medicine civitatis bononie, et maxime nostro collegio agregati, legant et presint lecture ordinarie de mane, ut moris est et fuit per tempora longiora, cuius initij memoria in contrarium non habetur. Et quod ipsi doctores collegiati, ut supra, tantum, et nullus alius, presit lecture ordinarie supradicte, vel legat ordinarie de mane. Et quod per aliquem quovis modo, colore vel causa, non possit vel debeat aliquis doctor civis bon. impedirj, neque ab ipsis doctoribus collegiatis removeri predicta sedes ordinaria. Et ad huiusmodi conservationem teneantur dicti doctores et collegium prestare auxilium, consilium et favorem ac iuvamen pro premissorum efficatia et observatione, silicet quod si contingat, quod deus advertat, aliquem nostrum doctorem, ut supra, quovis modo impediri vel molestari in dicta lectura, vel aliquem alium doctorem forensem velle legere ordinarie de mane, vel preponi ipsi [504] lecture quovis modo vel colore, ad eius instantiam vel non, teneantur omnes doctores dicti collegij toto posse resistere, et quibuscumque modis, etiam per desistentiam a lectura dictorum doctorum civium, et desistentiam a cura infirmorum, et consillio dictorum doctorum in quibuscumque casibus emergentibus in civitate bononie. Et prior, qui pro tempore fuerit, vel alius eius locum tenens, tunc teneatur mandare predictas desistentias et alia quecumque viderentur expedire pro observatione predictorum, sub pena ipsi priorj vel eius locum tenenti, privationis collegij et quingentorum florenorum aurj, aplicandorum pro tercia parte comuni bon., et pro alia tercia parte collegio antedicto, et pro reliqua tercia parte Domino potestati bon. Et ipse dominus potestas ex officio ipsius, teneatur dictam penam, ut supra, exigi facere et executioni mandare. Et nichilominus ipso iure facto sit privatus a dicto collegio et ad eandem penam teneatur quilibet doctor ei non parens in predictis mandatis desistenciarum, vel aliqua causarum.

Volumus etiam quod quilibet forensis examinandus, antequam admictatur ad privatum examen, iurare teneatur tempore presentationis de ipso fiende priori, in manibus prioris, qui pro tempore fuerit, vel officium prioratus gerentis, vel alterius cuj prior vel eius vices gerens comiserit, de non legendo ullo tempore sponte vel coacte cum alicuius mandato vel sine, in medicina de mane ordinarie in civitate bon., vel lecturam de mane suscipere directe vel indirecte, nec non similter iurare de non procurando vel actentando agregarj collegio predicto vel in eo assumi, et de non presentando ullo tempore per se vel alium, aliquem scolarem ad aliquod examen privatum vel pubblicum fiendum in scientia medicine et non tradendo per se vel alium ullo tempore alicui promovendo ad doctoratum in dicta scientia medicine in ipsa civitate bononie librum, vel insignia aliqua doctoratus, et de non exercendo actum aliquem de predictis, vel aliquem alium, pertinentem ad doctores collegij tantumodo, sponte vel coacte, cum alicuius mandato vel sine, ut supra, sub pena quingentorum florenorum aurj a quolibet et qualibet vice exigenda et comittenda quociens contrafactum fuerit et aplicanda, ut supra. Que pena applicanda collegio remicti non possit directe vel per oblicum. Que omnia collegium et doctores dicti collegij effectualiter et precise observare debeant, ut supra. Teneatur autem dictus forensis presentandus, ut supra, iurare, ut supra, de non veniendo ad publicum vel recipiendo aliqua insignia doctoratus, prius alibi quam in Civitate bononie, et etiam teneatur dictus examinandus iurare de non faciendo nec veniendo contra aliquam nostrarum constitutionum. Providentes etiam quod contra predicta vel aliquid predictorum non possit arengarj, consulli vel fieri aliqua dispensatio, suspensio, anullatio vel revocatio modo aliquo, causa vel colore. Et si contingeret per aliquem vel aliquos predictorum arengando, consulendo, proponendo vel consentiendo tacite vel expresse, aut perveniendo ad aliquem actum, per quem predicta, vel aliquid predictorum, peterentur o[b]tinerentur vel o[b]tinere possent, directe vel per obliquum, ipso iure incidat in penam quingentorum florenorum aurj, comictenda et aplicanda, ut supra. Et nichilominus talis contrafaciens omni honore, iure et comodo dicti collegij ipso iure et facto sit privatus perpetuo, in quo numquam possit congregarj. Verum autem civem civitatis bon. et verum bononiensem intelligimus, qui sit vere et naturaliter civis bon. originarius, origine propria et paterna vel propria et avita, vel propria et proavita. Propriam autem debeat vere probarj, ut in principio, sub [505] Rubrica de personis que possint esse de collegio habetur. Que probatio fiat et fieri debeat coram priore collegij, qui pro tempore fuerit, nec non et duobus doctoribus de antiquioribus dicti collegij presentialiter ad hoc ellectis et deputatis per collegium antedictum. Qui antiquiores sint secundum ordinem dicti collegij. Qui prior et duo doctores predicti simul omnes recipiant probationes predictas [et] per se tantum et fideliter et diligenter advertant, sub vincullo iuramenti, ne aliqua fraus comictatur, et si ipse, vel aliquis alius doctor dicti collegij, sciret vere, presuntive, vel probabilliter aliquam fraudem comictj, teneatur statim notifficarj dicto priorj dicti collegij vel eius locum tenenti. Qui prior vel eius locum tenens, teneatur statim ipsi collegio et doctoribus ipsius notifficare, ut ipsi provideant omnibus modis et remedijs, ne fiat fraus aliqua, tenendo in secreto nomen doctoris, qui hoc notificaverit, si ipse doctor voluerit, sub pena cuilibet doctorj non notifficanti, ut supra, ducentorum florenorum aurj aplicandorum, ut supra, et per notarium collegij probationes et alia in actis reducantur. Qui prior et alij duo doctores antiquiores ante omnia iurent corporaliter ad sancta dey evangelia, in predictis remoto odio, amore, timore, prece vel pretio, se dictas probationes legaliter et fideliter audire et recipere secundum quas eum civem vel non civem quo ad predicta pronumptiet et pronumptiare teneatur prior collegij, secundum relationem dictorum doctorum, si concordes fuerint, alias prout maior collegij pars fuit. Que pronumptiatio et declaratio fiat in presentia tocius collegij vel maioris partis doctorum eiusdem. Cui pronumptiationi stetur, nec contra ipsam quoquomodo fieri possit aut disponi, sub pena periurij. Adhicientes etiam quod nullus possit disputare in phisica nec in cyrugia, nisi prius o[b]tenta licentia a priore collegij medicine pro tempore existenti, nisi sit doctor medicine, sub pena cuilibet contrafacienti arbitrio dicti Prioris aufferenda.