Volumus, et presenti constitutione firmamus, quod dictus prior dicti collegij possit, teneatur et debeat congregare, et congregari facere dictum collegium, et doctores ipsius ad minus semel in mense pro omnibus necessarijs vel oportunis aut quomodolibet utilibus dicto collegio et doctoribus ipsius, sub pena quatraginta soldorum bon. pro qualibet vice, dum tamen congregari facere non possit pro aliquibus, vel aliquo, prohibitis, vel prohibito, in presentibus constitutionibus, sub pena periurij et quinque librarum bon. pro qualibet vice, qua contrafecerit, vel predicta facere obmiserit, exigenda et aplicanda doctoribus dicti collegij. Et incontinenti in congregatione predicta teneatur proponere quecumque non prohibita, ut supra, cum fuerint petita, prius tamen lecta posta, super qua dictum collegium providere debet, vel debeat, petendo consillium a doctoribus dicti collegij, super quo petitur provideri. Et secundum consillium et voluntatem consiliariorum, vel maioris partis eorum, ponat ad partitum cum fabis albis et nigris, et scrutinium faciendo de quolibet consillio per se, donec alterum ex predictis consillijs fuerit aprobatum, remanendo in ellectione dicti prioris, quod consillium proponere et proponere velit ex dictis consillijs et voces plurium doctorum, numero ibidem presentialiter existentium, sequi, si fabe fuerint equales, alias teneatur sequi et proponere illud, quod habuerit plures voces vel fabas ex dictis doctoribus. Que fabe colligi debeant per antiquiorem doctorem, vel per notarium, aut bidellum dicti collegij ibidem presentialiter existentes, qui debeat aperiri in presentia dictorum doctorum, ita quod publice a doctoribus ibidem existentibus videantur et videri possint. Que partita, provisiones et omnia fienda per priorem dicti collegij et doctorum ipsius scribi debeant per notarium dicti collegij. Et valleat, possit et teneatur ipse prior cognoscere sumarie et de plano, sine strepitu et figura iuditij, de omnibus et singulis questionibus, que verterentur, vel verti possent, inter prefatos doctores occaxione colegij prelibati vel quacunque alia occaxione, aut cum quibuscunque alijs singularibus personis litigare volentibus cum aliquibus [502] doctoribus dicti collegij, quacumque ratione vel causa, semper reservata forma nostrorum statutorum precedentium vel sequentium, quibus dominus prior non possit contravenire, dum tamen eas decidere non valeat sine consilio et assensu maioris partis doctorum dicti collegij. Et decisionj vel sententie illi stetur, nec ei possit aliquis dictorum doctorum contravenire vel contravenienti consentire, nec aliquo modo querelare ad regimen civitatis predicte, nisi in predictis non foret servata forma statutorum, vel nisi apareret manifeste ipsum indebite et perpere sententiasse, pena privationis collegij et centum bon. aurj, aplicandorum secundum formam constitutionum sequentium, tociens exigenda, quociens fuerit contrafactum. Ac etiam multare et condempnare, usque ad quantitatem decem soldorum bon. ad plus, quemlibet ex doctoribus existentibus, presentialiter presentibus in civitate bon., requisitum per bidellum dicti collegij, qui non interfuerit congregationj dicti collegij sine iusta causa, arbitrio prioris aprobanda. Quam requisitionem facere fieri teneatur dictus prior per bidellum predictum per unam diem ante congregationem fiendam de dicto collegio ad minus. Ita quod verisimiliter ab omnibus doctoribus sciri possit, dum tamen predictus, vel predicti doctores, non fuerint impediti ex probabilli vel necessaria causa, declaranda per dictum dominum priorem in sequenti congregatione fienda. Et eius declarationi stari debeat, ac etiam et omnes et singulos contrafacientes contra formam dicti collegij et constitutionis, sub penis in dictis constitutionibus contentis, et que multa, seu pena, aplicetur et exigatur ut supra. Predicta autem prohibita non debeant in aliqua congregatione proponere, nec proponi vel arengari dimictere, directo vel per oblicum, dispensatione facta vel non facta, sub pena priori predicto periurj et decem librarum bon. pro qualibet vice et cuilibet doctori contravenienti in predictis, vel non servanti predicta, pro qualibet vice periurij et decem librarum bon. et privationis collegij. Que omnes pene aplicari, exigi et dividi debeant, ut supra, et nichilominus ipso iure et facto dum dictus prior accedere velit ad predicta, vel aliquid predictorum, vel firmus steterit in congregatione dicti collegij pro predictis vel aliquo predictorum, sit privatus collegio antedicto. Et elligi debeat novus prior secundum formam superius traditam, et quod super predictis restitutio aliqua non possit fierj dum tamen in primis, ut supra, et non specialiter proibitis dictus prior aliquid proponere, dicere, facere non possit, nisi adsint personaliter due partes doctorum collegij existentium in civitate bon. Et quod prefati doctores non possint se congregare sine mandato dicti prioris, vel subrogati loco eius, ut supra, sub pena cuilibet doctorj predicta non servanti quinque librarum bon., exigenda per dictum priorem. Mandantes quod omnia et singula contenta in volumine presentium constitutionum, prout scripta sunt, in qualibet sui parte debeant inviolabiliter per priorem dicti collegij vel subrogat[um], ut supra, qui pro tempore fuerit, observari, et per quemcumque doctorem dicti collegij prelibati observarj, sub penis in dictis constitutionibus contentis. Adhicientes etiam in predictis quod ubi voces essent equales alicuius partiti facti inter doctores, ut supra, tunc dictus prior possit et valeat gratifficarj cui parti voluerit, et parti cui gratificaverit stari debeat modo et forma predictis. Et quod dominus potestas Civitatis bon. teneatur et debeat dare favorem et auxillium dicto priori in omnibus penis exigendis per dictum priorem vel massarium, aut cui comissum fuerit, vel exigere debeat. Mandantes etiam quod dictus prior omnes penas pecuniarias exigere debeat infra [503] mensem a die condempnationis, si tempus eidem aderit, alias prior sequens teneatur exigere ante mensem, a principio sui offitij incipiendo, sub pena dupli condempnationis, et quod nulla quantitas dicte pecunie vel alicuius condemnationis, possit per ipsum distribuj, nisi de consensu omnium doctorum seu duarum partium, scrutinio tamen prius inter eos celebrato, sub pena periurij et dupli dicte quantitatis pecunie contrafacienti. Prohibentes et expresse mandantes quod nullus ex doctoribus dicti collegij possit et valeat comictere vocem suam pro aliquo partito ponendo in dicto collegio inter eosdem doctores quacumque de causa. Et quod nullus ipsorum doctorum debeat admicti ad dandum aliquam vocem seu fabam in dicto collegio, nisi presens fuerit, sub pena priori dictam vocem admictentj decem ducatorum auri, dicto collegio aplicanda pro qualibet vice; et nichilominus ipsa vox in dicto partito pro nichil reputetur.