Statuimus et ordinamus quod doctores collegij nostrj continuo inter se habeant et habere debeant unum priorem ipsius collegij; qui prior elligatur ad brevia secundum modum acthenus observatum, ubi et quando processerit de voluntate prioris et majoris partis collegij. Quod si non fiat ad brevia, tunc fiat ellectio per voces cum fabis albis et nigris, et ille, qui plures fabas albas habuerit, sit et esse intelligatur prior; ad quam ellectionem prioris novj teneatur prior precedens procedere, cum vocato collegio, per quinque dies ad minus ante finem sui offitij, sub pena periurij. Cuius prioris, sic creatj et ellecti modo predicto offitium incipere debeat finitis tribus mensibus prioris, tunc suum offitium debentis finire, et duret tribus mensibus, ut supra, et non ultra, et aliorum priorum sic creandorum incipere debeat dictis tribus mensibus et duret, ut supra. Qui prior sic ellectus, tempore dicte ellectionis si presens fuerit, vel in proxima congregatione fienda de dicto collegio et doctoribus ipsius, iuret et iurare teneatur corporaliter ad sancta dey Evangelia, manibus tactis scripturis, in manibus tunc prioris, collegium prelibatum eiusque iura totis viribus deffensare et constitutiones eiusdem collegij observare iuxta ipsius possibilitatem, et non pati collegium predictum congregarj nec etiam congregari facere pro aliqua re vel facto, quo[d] videatur reddere posse, seu redundare posse in dampnum, dedecus vel obbrobrium dicti collegij, et quemlibet doctorem dicti collegij venientem contra dictas constitutiones dicti collegij, vel aliquam earum, verbo vel facto condempnare secundum formam et modum dictarum constitutionum. Et penas in quibus incurisse, seu incurisset, vigore dictarum constitutionum, exigere seu exigi facere infra tempus eius prioratus offitij, sub pena dupli eius quod fuerit condemnatus ille a quo exigere debuerit. Item quecumque et omnia eidem domino priori in secreto comissa fuerint per dictum collegium, in secreto retinere debeat, et non propalare, nisi et quando processerit de voluntate doctorum dicti collegij. Et etiam quod in dicto collegio non proponet nec proponi consentiet directe vel [per] oblicum, quod aliqua constitutio, vel eius pars, tollatur vel dispensetur, nisi sit [501] et in quantum caveretur et permicteretur ex forma dictarum constitutionem, vel alicuius earum, vel nisi processerit de voluntate trium partium ex quatuor partibus doctorum dicti collegij, presentialiter existentium in civitate bon., scrutinio cum fabis albis et nigris inter ipsos primo legiptime celebrato. Et quod congregabit et congregari faciet predictum collegium, tociens cociens videbitur congruum et oportunum fore pro bono et honore comodo et utillitate dicti collegij, et decori doctorum eiusdem, et non aliter nec alio modo, nec alia causa, et etiam quociens fuerit requisitus per tres doctores dicti collegij antiquiores, vel per consilliarios. Quod si forte aliter factum fuerit, ipsa congregatio et omnia et singula in ea ordinata vel facta, ipso iure et facto sint et intelligi esse debeant cassa et vana ac nullius efficatie. Volumus etiam quod post ellectionem prioris elligantur duo conscilliarij secundum formam predicte constitutionis de ellectione prioris, qui habeant ipsi priori consullere sub vincullo iuramentj, eis prestandj, de eis que crederint honorabillia fore, paciffica et utillia ipsi collegio et doctoribus eiusdem, ac cum dicto priore talia facere secundum consuetudinem.